那年炎夏中我最不願放下的,是那個發燙的電話|Christine

http://www.iloveapps.hk/wp-content/uploads/2014/01/whatsapp_no_one.jpg

那年炎夏中我最不願放下的,是那個發燙的電話

而家距離下一次考德文仲有一段時間,而報大學嘅事亦都上哂軌道。亦都可能因為咁,所以近排無咩特別嘢煩心。可能人就係咁犯賤,食飽飯無嘢諗就會諗起好多以前嘅野。如果回憶係大海,咁我呢幾排真係跳咗入呢個無底嘅大海深潛。而家我嘅狀態同仲日日想當年嘅維園老伯唯一嘅分別只係,我並唔會去晨運。

但真正令我提筆嘅,其實一個朋友喺香港send嚟嘅Facebook Message。

“Do you have time to phone me”

好老實講,嗰一刻喺街睇到真係好想即刻打+852返去打比佢,除咗想睇下佢係咪又唔開心之外,其實係因為真係唔知幾耐無同人傾過電話。喺呢度我每個月得200分鐘,仲要呢200分鐘都無可能用得哂。喺度搵鬼同我傾電話?不過就算係香港,都無人同我傾電話。Voice Note啦,仲傾電話咩。

傾電話真係一個最經典嘅消耗時間嘅方式,但亦都係我最鍾意同人溝通嘅方式。中學時代每次道別,最例牌一定會講嘅係,「喂,上車再傾啦,記得打比我。」

以前返屋企搭小巴,如果搭中嗰架喺舊式小巴,引擎嘈到傻;而搭中新式嘅,係就係行車嘅時候係靜啲,但係每次開關門嘅警告聲真係會令到人乜都聽唔到(仲未講個friend可能都係搭緊小巴 :o) ) 。但一切嘅野都無阻我傾電話,就算返到屋企搭電梯都係可以唔洗收線,返到去衫都唔換就開著電腦繼續傾。

傾傾傾,傾到手機無電,但一切並唔會就因為無電而完結,就算睇超人迪加佢個心口紅色粒燈係度閃,故事都唔會就咁完啦係咪先。好簡單,換返屋企電話繼續傾,順便幫自己手機叉電,傾到屋企電話無電,再調轉用手機傾。

講下學校嘅不平事,講下政治,講下是非,所以傾爆手機嗰2000分鐘,其實真係唔難。

又或者其實有時都唔係「傾電話」,有時係就咁夾住個電話,個朋友係度彈琴,就算佢彈得唔順,仲要彈一百次都係彈錯音,但都照係度聽;就算傾到條頸好痛,個電話好熱,我都係唔會收線。

因為電話呢樣嘢,同感情一樣,拎得起唔係咁易放得底嘅。而收線呢樣野,你明知可以再聽日打過,但你總係唔會肯咁做。

但之後Form 6 後期有得Whatsapp,「又傾爆分鐘啦你!我就話做生意傾3000分鐘姐,你又做乜傾2000幾分鐘電話?」呢句野隨住傾電話呢樣「課後活動」被Whatsapp取代之後,都真係無聽過。

當日同我會傾電話嘅朋友,而家亦都好似我咁去咗外國讀書,好老實講呀,基本上大家嘅生活好少會任何交集。但有趣在嘅一樣野就係咁發生。

到早幾日同返以前有同我傾電話嘅朋友傾Skype,都未開口佢就會知道我想講咩。我都會係度諗,其實可能就係因為當年大家唔同學校,好難成日見,所以成日傾電話,天南地北乜都講,建立咗一樣真係 voice note 建立唔到嘅超穩固嘅友誼。就算而家好難會見到,亦都唔會成日聯絡對方,但係感覺真係無生疏過。

傾電話唔會好似voice note 咁將大家嘅對話剪開。無疑,voice note 對於我呢啲唔鍾意喺電話打字嘅懶人好方便,亦都比冷冰冰嘅文字更易感受到對方嘅體溫,但係講最即時嘅溝通方式,就真係講電話莫屬。Voice note你有冇得中途駁嘴,咁有火花?

但其實講到尾,與其話係掛住同人傾電話,其實係更掛住嗰一段為咗朋友可以幾個鐘乜都唔做,只係為咗聽佢呻,聽佢講開心嘢嘅日子。

而你而家仲可以為你嘅朋友放低手頭上嘅工作,花幾個鐘頭嘅時間,聽佢講野嗎?