港劇|新笙代

http://upload.wikimedia.org/wikipedia/zh/6/60/%E5%8F%9B%E9%80%83.jpg

今個星期tvb推出左一套以反恐部隊為主題嘅時裝劇「叛逃」,正當我打算讚tvb今次有創意、題材新鮮嘅時候,一打開片頭曲就比我發現到一個似曾相識嘅組合,陳展鵬配陳茵薇咦,我好似啱啱先係馬來西亞見到佢地兩個,咁快又玩厭檳城,返香港加盟警隊嗱。不過算啦,都慣左tvb係咁,大家繼續鬧,又會繼續睇。直到尋日睇到第三集,我開始懷疑無綫編劇班入面係咪有一堂係講「陳展鵬劇集formula」:

(1)阿媽要由李司棋飾演(心路gps、巨輪、叛逃)

(2)同陳茵薇要有感情線(單戀雙城、叛逃)

(3)要同親細佬鍾意同一個女仔(巨輪、叛逃)

(4)要擔任警方潛入黑社會嘅臥底(巨輪、叛逃)

唔該你啦無線,你係咪真係咁缺演員呀,雖然我明白男主角母親健在,有女朋友,有情敵係好正常嘅劇情,但你可唔可以唔次次都搵李司棋做佢阿媽,陳茵薇做佢女朋友,細佬做佢情敵呢?阿媽方面你可以試下搵韓馬利丫,橫掂佢都差唔多演過全台所有一二線小生花旦嘅媽媽,唔爭在做埋陳展鵬個阿媽啦。至於女朋友,我會建議你揀宣萱,劇集中段仲可以加一場綁架戲,黎一場英雄救美,順便延續宣萱每次拍劇都會被綁架嘅紀錄。最後,當然唔少得紀律部隊專用嘅出動結局啦!

之後,我就將以上嘅發現post上fb同親朋戚友分享喇。然後,我睇到一啲來自親戚嘅留言,大家一家人,留言應該係最中肯,所以留言內容好值得令我反思!「電視精, 厲害!」「咁得閒煲劇,TVB 好彩有你,否則……」最令香港劇集可悲嘅係,哩一位親戚最近先多次喺whatsapp group、fb極力推薦朋友睇一套以外星人為題材嘅韓劇。換句話說,佢都認同煲劇係正常娛樂。只不過,原來係而家嘅香港人眼中,睇港劇喺一件「咁得閒」先會做嘅事換轉係佢,佢好可能將櫃桶底嗰套天國的雞批翻睇過幾十次,睇 harry potter 睇到連appendix 都識背,佢先至會打開電視睇港劇。

Tvb嘅工作人員、香港嘅媒體製作人們,如果你地有睇機會睇倒哩遍文,請你地繼續努力做好你地嘅工作,唔好放棄,香港嘅媒體製作已經落後緊其他地區,我地已經再輸唔起,你地要加把勁,水準追過其他地區。喺香港,好似我哩種麻目支持本地生產嘅年輕人已經唔多,請你地唔好再容許觀眾流失喇,若情況繼續惡化,香港好可能比其他地區文化、甚至經濟侵略。我唔希望去到2036年,會發生以下嘅情況:

場合: 2036年大學同學聚會

我:咦Billy,好耐無見喇喎,你仔仔Billy Jr就五歲喇喎,咁細個就咁靚仔,第日大個仔可以做明星

Billy: 係阿,下星期就生日喇! Hey! Billy Jr, come say hello and thank you to uncle, he said you’re handsome!

Billy Jr: Thank you Uncle!

我:吓Billy,乜你帶左個仔返加拿大讀書咩?

Billy:無阿,點解咁問?

我:咁點解佢喺香港住都唔識廣東話嘅?

Billy:邊有咁多時間學呀,已經要返兩間幼稚園,之後又有興趣班,同埋反正都無咁嘅需要

我:咁又係,今時今日香港地,返工用英文,shopping用普通話,睇menu用日文,睇電視聽歌用韓文,就連去茶記,大家樂都要用普通話落單,邊使識廣東話呢!

Billy:真係懷念當年tvb仲未執,我地仲有港劇睇果時!

我:唉。。。往事只能回味!