[出廳堂] 減肥的成魔之路

首先感謝半生熟俾我係度寫專欄，本身其實我都係電台個邊既主持人，而家好榮幸可以係度小試牛刀，執筆寫專欄。

我自己就真係唔慣用書面語寫野，再加上我覺得我既專欄唔會寫啲太過學術性或者政治化既野，都係一啲生活化既好似教你煮下飯呀話你知近期有咩好劇煲之類，所以一切以口語化，輕鬆為主。
寫既我係禁，希望睇既你地都係。

開閘第一post，我想講下減肥。
我並唔係想曬命話自己又幾成功，的確我係由一個百四磅既肥妹減到九十幾磅。我只係想鼓勵所有要踏上呢條長征既女士們，只要有恆心，鐵柱真係會磨成針。

目標/理由
減肥好講求意志力，要抵擋得住所有誘惑，所以我建議大家係決定做呢件事之前，訂一個目標俾自己，問自己為咩要減肥，然後就將你既目標print出泥貼係當眼既地方。
攞我自己泥做例子，我係受左情傷先減肥架陰公。當時我form4，鐘意左個男仔，我係背後聽到佢同人講(下柵500字):唔係呀嗎，佢禁肥我難啲會鐘意佢囉!第一下聽到我梗係喊啦，覺得個男仔真係衰到爆! 我同自己講，一定要令到佢覺得唔簡我係佢既損失! 自此我就print左佢講既個句說話貼係房度啦。

唔好盲目跟人同不切實制
坊間有好多層出不窮，五花八門既減肥方法，以過來人既身份禁講，要先了解自己既體質，知道自己食咩會肥食咩會減，之後先開始定啲餐單禁先有用。我講俾你聽我點減都得，不過真係未必人人啱用。仲有，千其唔好定啲無可能既任務，例如一星期減五磅之類既廢話，到頭來做唔到唔開心就會無左動力，雖知道減肥絕不能一步登天，欲速則不達。

我應為普遍人都啱用既減肥tips
起身一杯檸檬水加兩杯普通溫水
2.少飲甜野，盡可能飲多啲茶同水
3.少油少鹽少糖(唔係叫你全戒!身體都需要油份既)
嘗試九點後少啲進食同飲水
5.少食殿粉質例如飯(我試過2年唔食飯)
6.我既金句:有得行就唔好企，有得企就唔好坐，食飽之後一個鐘頭都盡量唔好坐係度
7.食飯有次序，先飲湯，食菜，最後先食肉同殿粉
8.每2日磅一次重，有進步既時候可以輕鬆一下食啲零食
9.慎選零食(本人為零食控，戒唔到惟有慎選，綠色百力滋其實唔錯)
10.唔好怕辛苦，做運動同拒絕誘惑
平台期又有咩好怕喎!!
減過肥既人都一定經歷過平台期，呢個叫天不應叫地不聞既無間地獄。平台期好簡單，姐係點減個磅數都唔落，你話是咪好想死?
當我減到90磅既時候，我諗係因為減上癮，一見到個磅數唔上唔落，我就停唔到禁諗方法。最痴線既時候我試過一日淨係食三塊梳打餅同一枝水，又話姐baby food加v8，而家諗番都唔知係米人食…但係就真係點做都無用…
我最後終於諗通左，平台期係身體通知你:喂老細到頂啦喎!你再減就唔掂嫁啦!我望住塊鏡，發覺原來我已經變成一塊人乾…之後我用左一段小時間健康禁增磅，變番個正常人。

真正既戰鬥
人地成日話減肥難，我自己覺得keep住仲難。真正既挑戰，其實係減完之後先開始。實不相暪其實我都肥番少少，不過後來我發覺健康先係最好睇，太瘦反而仲核突。所以我覺得保持開朗既心情，均衡飲食，就會自然瘦落泥，所以唔好對自己太過嚴格，身體健康先至係最無價!

後記
當年個個男仔，係我減完肥之後約我出街(好幾年無見)，出完之後佢就text我問我可唔可以做佢女朋友。
佢都痴線…